واضح رہے کہ طلاق کے واقع ہونے کے لیے ضروری ہے کہ طلاق دینے والا عاقل ہو یعنی اس کا دماغی توازن ٹھیک ہو، پس اگر کوئی آدمی ایسا ہے کہ اُس کا دماغی توازن ٹھیک نہ ہواور طلاق اور دیگر امور کا علم نہ رکھتا ہو یا ایسی حالت کبھی کبھی اس پر آتی ہو اور وہ اسی حالت میں طلاق کے الفاظ کہہ دے تو ایسے آدمی کی دی ہوئی طلاق واقع نہیں ہوتی۔ لیکن جس وقت دماغ درست ہو اور دیگر معاملات صحیح طریقے سے انجام دے سکتا ہوتو اگر ایسی حالت میں طلاق دی جائے تو وہ طلاق واقع ہوتی ہے۔

لہذا صورتِ مسئولہ میں جس وقت اس شخص نے بیوی کو’’جا تمہیں تو میں نے طلاق دی ہے‘‘کے الفاظ کہے تھے، اس وقت بیماری کی وجہ سے اس کا دماغی توازن ٹھیک نہیں تھا(یعنی ایسی بیماری ہو کہ اس کے ہوش وحواس قائم نہ ہو اور طلاق وغیرہ کا ادراک نہ کر سکتا ہو) اور ڈاکٹر بھی اس بات کی تصدیق کرتے ہوں تو ان الفاظ سے اس کی بیوی پر کوئی طلاق واقع نہیں ہوئی ہے اور ان دونوں کا نکاح قائم ہے۔ لیکن اگر اس وقت اس کا دماغی توازن ٹھیک تھا(یعنی طلاق کا ادراک کر سکتا تھا) تو اگرچہ یہ دماغی مریض ہے پھر بھی اس کی بیوی پرطلاق واقع ہو چکی ہے، صرف دماغ کی نارمل بیماری کی وجہ سے چھٹکارا پانا مشکل ہے۔